Margareth eta George Arizonako mugara iritsi dira. Emakumea musikal bat egiteko irrikan dago. Gizonak muga defenditzeko eginkizuna du… baina norengandik? Margie, ikusminez beti, eta George burugogorra parodiarik zoroenen eta tragediarik gordinenaren arteko mugaldean mugitzen dira. Arizona ez dago urrun. Arizona hemen dago, Pausuan, Melillan, gizaki batek bizimolde hobeagoa lor ez dezan eraikitzen den horma bakoitzean. Testuak gogoeta egiten du mugez, migrazioaz, gizakien ergelkeriaz eta manipulazioaren mugez; horrez gain, bizitzaren basamortuan galdurik dauden bi gizakiren erretratu tragikomikoa da.